ليس كل ما يتمناه المرء يدركه .. Ek Villain
****************************
وبعد طول انتظار نزلت النسخه البلوراى .. واتطمنت ان الربيع العربي كله اتفرج على الفيلم .. عشان اكتب براحتى بقى
القصه :
شاب يقع فى حب فتاه ويتزوجها ... ليأتى القدر ويأخذها منه معيداً اياه لعالمه المظلم مره اخرى ... ويبدأ بالسعى للانتقام لمقتلها ...
بطولة :
سيدهارث مالهوترا : جورو
ريتيش ديشموخ : راكيش ماهادكار
شرادها كابور : عايشه
الاداء :
سيدهارث مالهوترا : واخيراً بدأ سيدهارث يتعود على الشاشه ويظهرلنا مواهبه ... فى اداء قاتم ... ملئ بالدموع ... مفتكرش انى شفته فى مشهد غير غاضب ... بعد ادوار الشاب السهتان ... شفناه غاضب مكلوم ... حزين ... عايش فى ظلام ... ولما فكر يفتح بابه للنور ... سابه النور ومشى ... ادائه كان جيد جداً ... ولكنه لسه جواه نوع من البروده ولم يطلق العنان لمشاعره بالكامل ... اكتر مشهد وجعنى اوى وهو بيسوق العربيه وعيناه مليانه دموع ... اد ايه من وحش ميعرفش المشاعر لطائر باكى .. تحول كبير فى شخصيه بالجمود دة ... حبيته واتأثرت بيه .. بس مقدرش يبكينى ... ادائه يستحق 3.8/5
ريتيش ديشموخ : يخربيته نجوى_كرم_ستايل .. بجد يخربيته ... هو فى كدة ... طيب كوميديان يضحك الحجر وقولنا ماشى ... انما كمان دور شرير لا ومريض نفسى ... كان مفاجئه الفيلم كان عصب الفيلم نفسه ... اداؤه لشخص سايكوباتى ... بيقتل كل ست بتفكره بمراته لمجرد انه مش قادر يقتل مراته كان عظيم ... وطبعا واضح اوى ان ريتيشخ تخن عشان الدور ... وشه تخين اوى اكتر من دوره الكيوت فى Humshakals .. دوره اثر فيا اوى ... كان نفسى حد يفهم معاناته ومرضه ويعالجه ... بس حلال فيه نهايته بصراحه ... ادائه يستحق 4.5/5
شرادها كابور : ادائها اتحسن كتير عن Ashiqui2 كنتوا تفتكروا انى انتقدت برودتها فى الاداء ... انما هنا لا ... كانت مختلفه جدا ... كانت وجعانى جدا ... مكنتش بضحك على اى نكته تقولها اد ماكانت بتوجعنى ... ادائها لدور البنت اللى عارفه ان ايامها معدوده وهتموت قريب ... وعشان كدة قررت تعيش الايام دى وتتبسط وتفرح الناس كان رائع ... ضحكها ولعبها وتهريجها ... كانت ممتعه ... تحب تتفرج عليها ... بس فى احيانا تانى كنت بحس انها اوفر ... لان شرادها بطبعها مش شقيه انما شخصيتها قريبه لدورها فى عاشقى 2 ... فاكان تحدى ليها انها تعمل دور زى ده ... اداؤها يستحق 3.5/5
تحليل :
- اول دقيقتين فى الفيلم ... عاديين ... بس اول ماتبدأ الدقيقه التالته بتلاقى صدمه مرعبه ... بطلة الفيلم بتتقتل ... طيب مين هيكمل الفيلم ... البدايه مرعبه ... بتخليك واثق انك قدام فيلم رعب بالدرجه الاولى ...
- الكيميا بين شرادها وسيدهارث كانت كوميديه ... يعنى زى ما تقولوا كدة العلاقه بين الازازه والكوبايه ... والملاك والشيطان ... ومع ذلك كانوا ثنائى حلو اوى ... انا شخصياً حبيتهم سوا ... وخصوصا ان الكيميا اللى بينهم متحولتش لاحياء ومشاهد فاضحه ...
- الاحداث مش ماشيه بنسق تصاعدى اكتر ماهى ماشيه على خط مستقيم ... غورو طول الخط بيحاول ينتقم ... مع الاحداث بقى ...
- الفلاش باك عجبنى ... بحب انا افلام الفلاش باك دى ... يديلك حدث من الواقع وحدث من الماضى
- مش بس ثنائية شرادها وسيدهارث اللى كانت حلوه ... كان فى ثنائى احلى فى الفيلم .. ريتيش وسيدهارث ... الكيميا اللى بينهم كانت مرعبه ... المشاهد اللى جمعتهم تحبس الانفاس ... وخصوصا اول لقاء وتانى لقاء واخر لقاء ... الغضب والخوف والكراهيه والوجع ... كان رهيب
- فى شوية مشاهد قتلتنى ... منها مشهد سيدهارث لما بيعرف انها كانت حامل ... ولما بيفضل يضرب ريتيش ويقوله كانت حامل ليه عملت كدة ... ومشهد وهو بيطلب منها متمشيش وتفضل معاه ...
- فى مشاهد رعبتنى ... مشهد سيدهارث لما قابل ريتيش فى بيته ... حسيته انه مرعب اكتر من ريتيش نفسه ... لو فى شيطان فى الفيلم فاهو مش ريتيش اكتر من سيديهارث ... كانوا بيتنافسوا مين يبقى مرعب اكتر طول الفيلم
- لو ركزتوا هتلاقوا ان شخصية شرادها فى الفيلم قريبه اوى من شخصية كالبانا فى فيلم Ghajini مع فرق ان اسين يمكن كانت طبيعيه وتلقائيه اكتر فى الدور ... ودة بيرجع للخبره والشخصيه اكتر من اتقان التمثيل
- السيناريو فى الفيلم جيد ... حبيت جمل كتيره فيه زى مثلا :
لما شرادها قالتله :
"الكراهيه لا يمكنها طرد الكراهيه .. الحب فقط يفعل ذلك "
ولما سيدهارث قالها :
"اعلم انه لا يمكننى انقاذك من الموت .. ولكن يمكنك ان تبقينى على قيد الحياه "
- الاماكن اللى اتصور فيها الفيلم ... اتسمت بالبرود نوعاً ما ... فاهى اما اماكن عاليه ... او شوارع بارده ... وضلمه ... تقريبا الفيلم اتصور فى الشتا ... مش ممكن البروده اللى كانت فيه ....
- الفيلم من اخراج Mohit Suri وهو مخرج عاشقى 2 على فكره ... وايك فيلان يعتبر تانى فيلم ليه يدخل نادى المئه كرور ...
- الفيلم مش جديد فهو اعادة انتاج للفيلم الكورى I Saw the Devil وطبعاً دة فيلم عملاق جدا ... وانصحكم تشوفوه ...
- الموسيقى والاغانى كانت اكثر من رائعه .. هتكلم عنها بالتفصيل كمان شويه ...
- النهايه كانت مرضيه جداً ... وحبيت اوى انه بدل قتل الطفل اخده وتربيته ... كنت مرعوبه سيدهارث يموت مع ريتيش ... كنت هنتحر ..
سلبيات :
- اولاً برودة الفيلم ... الفيلم معبق برائحة الموت ... بالكآبه ... يمكن انتظرت البلو راى عشان اتأكد من احساسي دة ... ولكن فعلا الكآبه طلعت فى الفيلم مش النسخه
- الافوره ... فى شوية حاجة كانت اوفر شويه .. انها كانت مريضة سرطان وهوبا خفت ... لا يارجل ... من غير علاجات ومن غير عمليات ولا اى اندهاش كدة ...
الموقف التانى بتاع ان ريتيش يموت وسيدهارث يقول للمرضه صحيه ... هو اها حقنه الادرينالين ممكن تعيد النبض لعضلة القلب بس مش جنب الحمام ويعملها واحد ملوش فى البطيخ ... والا كل ما حد يموت كنا نصحيه بحقنه ادرينالين
- المدة ... مدة الفيلم ساعتين ... موضوع سخيف فحت ... فين ايام الافلام الهندى الـ 3 ساعات ... ونقعد نعيط ونتشحتف وننف ونعيش حياتنا ... فين ايامك يا شارو وسلمان ... كانوا بيفحتونا وبيعدمونا العافيه والفيلم ميخلصش غير لما يخلص علينا ... انما الفيلم دة كان سريع اوى ... ملحقتش اعيشه ولا اتأثر بيه ... كان محتاج يتفرد شويه ...
الاغانى_الموسيقى :
الفيلم دة بشكل اكيد هياخد جائزه احسن اغنيه او احسن تراك موسيقى السنادى ... الجايزه دى مش هتعدى من تحت ايده ... الموسيقى كانت لـ ميثون وانكيت تيوارى .. وكلمات الاغانى كانت لمانوج وميثون ...
مش هقدر اقول اكتر من ان اكبر انجازات الفيلم دة اغانيه وموسيقته وتوزيعها ... كانت عبقريه ... كلمات الاغانى تجنن .... مفيش اغنيه وحشه .... مفيش اغنيه مش هتعلق معاك ...
Galliyan .. اغنية الفيلم الرئيسيه ... ورائعه جدا سواء الميل او الفيمال فيرجن ... كلماتها ولحنها اكتر من رائع ..
Zaroorat : بالنسبالى حبيتها بشكل مش منطقى .. راااااائع وكلماتها مذهله بشكل لا يوصف ...
Banjaara : تحس انك بتقرى قصيدة شعر اكتر ما بتسمع اغنيه ... فعلا حنونه جدا وجميله جداً ..
دول اكتر 3 اغانى علقوا معايا فى الفيلم ...
من الجدير بالذكر ان اسم الفيلم كان Villain ولكن لان ارجون رامبال سبق واشترى الاسم ... فتم تغيير اسمه لايك فيلين ..
الفيلم دخل نادى المئه كرور بأرباح 105 كرور ...
الفيلم صالح للمشاهده العائليه ... لو هما متبحبحين وموديرن سيكا
تقييم الفيلم فى الموقع العالمى IMDb 6.5/10
تقييمى له .. 3.8/5
يستحق المشاهده اكتر من مره ...