علاقات وخلافات بين سلمان خان وأيشوريا راي

سلمان وآيشواريا ,, من حب الى عداوة! , فما السر ؟!!

احم احم اول تقرير ليا وارجو انه يعجبكم  هو طويل بس الموضوع كبير اكماحه 

هيكون عن ثنائي مستحيل نشوفه عالشاشات مرة تانية ,,
سوبر ستار بوليود سلمان خان 3> 3> وحسناء بوليود آيشواريا راى .

معظمكم عارفين ان كان فى قصة حب مشتعلة بين سلمان وايشواريا بس حصلت مشاكل جامدة جدا وافترقوا  ,, ازاى بقى بدأت العلاقة وازاى انتهت ؟ دا اللى هقوله فى التقرير دا 

فى البداية هما عرفوا بعض وكان سلمان خان نجم مشهور جدا فى بوليود اما ايشواريا فكانت ملكة جمال العالم وشهرتها ضئيلة فى بوليود لكن كانت مشهورة الى حد ما بسبب انها كانت بتقدر تأثر على الصحافة ويقال انها كانت بتدفع فلوس لان سوشميتا سين كانت ملكة جمال الكون فى نفس السنه ومع ذلك مفيش اى حد اهتم بيها وكل الاهتمام انصب لناحية ايشواريا  نرجع لموضوعنا بقى

اتعرض على ايشواريا بطولة فيلم سلمان هم ديل تشوكى سانام وهى وافقت ومن هنا بدأت قصة الحب ,,  وسلمان وقع فى حبها لشوشته لدرجة انه حاول يغير نهاية الفيلم علشان ما يتفرقوش فى نهاية الفيلم  بس النهاية متغيرتش 
الفيلم نجح جدا والناس حبت الثنائي وشجعتهم على الاستمرار

ايشواريا استفادت جدا من معرفتها لسلمان لانه عرفها على المخرجين والنجوم الكبار وشاركت النجم شاروخان فى رائعة ديفداس  والفيلم دا ضمنلها شهرة كبيرة جدا حتى ان الفيلم اترشح لمهرجان كان

ايشواريا ضمنت شهرتها واهلها فجأه رفضوا علاقتها بسلمان بحجة ان سلمان مسلم وهما هندوس >>
وبجانب غيرتها من سومى على صديقة سلمان الى الان وحبيبته السابقه ,, والد ايشواريا كبر الموضوع وراح بيت سلمان مع ناس كتير هندوس لكن والد سلمان رد عليهم رد عنيف والموضوع كبر اكتر .. ايشواريا انتظرت من سلمان انه يعتذر هو واهله لوالدها وسلمان حاول يصالحه من غير ما يضطر والده للاعتذار ويقال انها كانت منتظره انه يغير ديانته علشانها >>  ,, لكن هو طبعا رفض
و بدأت هى تتهرب من سلمان وماتردش على مكالماته وتتحجج انها نايمة او مشغوله

سلمان اتصل عليها فى يوم كانت بتصور مع شاروخان فى فيلم تشالتى تشالتى وسألها هى فين واعطته عنوان لوكيشن غلط ,, سلمان لما وصل للمكان الصح كان على آخره منها ويقال انه كان سكران وعمل حناقة جامدة فى اللوكيشن واصر انها تمشي وتسيب التصوير وشارو اتدخل وايشواريا اتسببت فى مشكلة كبيرة بين الصديقين 

يقال ان شاروخان هددها لو سابت التصوير ومشت مع سلمان هيخرجها من الفيلم وهى سابت التصوير وبالفعل شارو زعل وتم استبدالها برانى موخيرجى وشارو امتنع عن التمثيل معاها نهائيا لحد النهارده وحصلت مشاكل جامده بينهم وهاجمته فى الصحافة ,, نبقى نعملها تقرير مخصوص

استمرت ايشواريا فى التهرب من سلمان وفى الفترة دى عملت فيلم مع فيفيك اوبيروى اللى نقدر نقول عليه كبش الفداء لايشواريا 
وبدأت ايشواريا تحارب سلمان بعد علاقة حب استمرت عامين وادعت مدمن وسكرى و انه ضربها وانها كانت هتموت لكن كله كان كلام ومفيش موجود أى اصابة
الصحافة كالعادة انحازت لايشواريا وقدروا انهم يشوهوا سمعته ويطلقوا عليه لقب الولد السئ والفتى المدلل لبوليود ,,
لكن الفنانين الكبار وقفوا معاه ودافعوا عنه وانتقدوها وكدبوها

وبدأت ايشواريا فى قصة حب مع فيفيك اوبيروى فى اعتقادى واعتقاد معظم الناس انها عملت كدا علشان يحارب سلمان وفيفيك عمل مؤتمر صحفى اتهم فيه سلمان انه زير نساء وانه خان ايشواريا وانه ضربها وقال ان معاه تسجيلات لسلمان بيهدده فيها بالقتل وقال لسلمان تعالى وماتنساش انى كنت ملاكم  ,, الشرطه دورت عالمكالمات لقت مفيش اى حاجة من الكلام دا وان فيفيك كداب

سلمان تحاشي الصحافة ورفض انه يتكلم عن ايشواريا ولما اتكلم دافع عنها وقال انه بيحترم فيها انها فتاه هندية متخلتش عن اهلها وخسرتهم بسببه .

وقال انا احترم النساء ,, ولو ضربت حاجه بقبضتى بتتكسر فلو ضربت واحده اكيد هيبقى فى اصابات وكالعادة رفض يتكلم كتير

ايشواريا فرقعت فيفيك بعد كدا  وكان هو الخاسر الاكبر فى الليلة دى ,, سلمان استمر فى حياته واستمر فى النجاحات اللى لسه بتكبر لحد دلوقتى مع الايام 

وايشواريا تزوجت ابهشيك ابن ال باتشان اللى هما طبعا احد اكبر العائلات فى الهند ,,

بينما فيفيك مهنته اتدمرت كليا والمخرجين والفنانين امتنعوا عن العمل معاه وبعد اعتذارات متكرره لسلمان فى الصحافة وفى حفلة على العلن سلمان سامحه ورجع المخرجين يشتغلوا معاه تانى ,, لو التقرير عجبكم هعمل تقرير عن مشكلة فيفيك دى 

يقال ان سلمان لسه بيحب ايشواريا ومش قادر ينساها وهى لسه بتحبه لحد دلوقتى لكن مصلحتها تأتى اولا

من الحاجات اللى بتضحكنى فيديو سلمان كان بيستعرض على المسرح وايشواريا وابهشيك بين الحضور وسلمان حدف بوسه  للجمهور فى نهاية الاستعراض قامت ايشواريا ضحكت وبصت لتحت بكسوف كته  وجوزها قاعد جنبها  

عامة الحكايه دى فيها كلام كتير اوى ومعظمه غير مؤكد بس انا بحثت كتير وحاولت اجيب الاحداث الموثوق فيها واللى عليها اجماع من الناس .

اخيرا وليس آخرا بعتذر على الاطالة والله حاولت اختصر على قدر الامكان وفى حاجات كتير ماقولتهاش  , وارجو ان التقرير يعجبكم