تقرير عن فيلم Humpty Sharma Ki Dulhania 2014
#القصه:
هامبتى الشاب المستهتر الفاشل .. يقع فى حب كافيا قبل زفافها بشهر .. مما يعرضه لمواجهات قويه كوميديه مع والدها ..
#بطولة :
فارون داهاون : هامبتى شارما
عاليا بهات : كافيا براتاب
#الاداء :
فارون داهاون : الولد دة عندى معاه مشكله ... وهى ان وشه فيه كمية قبول وصفاء يجبرك تحبه بصرف النظر عن دوره ... عنده بيبي فيس يعقد ... وضحكه جنان ... بس دة مايمنعش ان عنده baby mind كمان ... نتكلم الاول عن الاداء وبعد كدة نشوف مشكلته ... اداؤه فى الفيلم كان على #مقاس الفيلم ... مش افضل ما عند فارون ... اداؤه فى Student Of The Year كان اقوى اداء قدمه فى مسيرته الفنيه حتى الان .. بس دة مايمنعش ان اداؤه المتواضع فى فيلمه دة كان صادق ويستحق 3/5 ...
مشكلتى مع فارون بقي اختياراته ... فارون عنده كاريزما وقبول ودم شربات .. بس اختيارته صفر ... واخاف انه يبقى مع عمران خان فى قايمه موهوبون ولكن بدون اعمال ... وطبعاً هو على عكس سيدهارث ... اللى كتير مننا انتقد ان شخصيته فيها حاجة غلط ... بس اختيارته ذكيه جدا وفاهم هو ماشى ازاى .. ودة هيخليه من نجوم الصف الاول بالكتير بعد سنه ... زى رانبير كابور ... يعنى احنا بنشوف نفس قصة ولاده رانبير كابور وعمران خان مره تانيه فى فارون دهاون وسيدهارث مالهوترا ... لو فارون مركزش بعد كدة فى اختياراته ...
عاليا بهات : مش هقول اكتر من اللى قولته عن فارون اداؤها كان متواضع جداً على اد الدور حسيت بيها وضحكت معاها ... وقولت عليها مطرقعه ومجنونه ... ولكن لازلت مصره على ان مش دة الفيلم اللى تقدمه بعد Highway .. ولو تفتكروا فى تقريرى عن 2 States Movie قولت نفس الكلام ... هى مبدعه وعندها قدرات اكثر من رائعه .. طيب ليه متركزش فى اختيارتها ... اداؤها كان يستحق 3/5
#تحليل :
- مبدئيا وقبل كل شئ لازم نتفق على ان الفيلم دة هو محاولة لاعادة انتاج Dilwale Dulhania Le Jayenge - Official .. وزى ماتكلمنا قبل كدة ان اى ريميك او جزء تانى لو مكنش جامد اوى ... مش هيقدر يصمد قدام الفيلم الاوريجنال او الجزء الاول ..
- بداية الفيلم تقليديه جداً شاب فاشل عنده امتحان وطبعا بيسقط فيه مع ضحكه تعقد .. وخناقة بنت ريفيه مع اهلها لانها عايزه تشترى فستان لمانيش مالهوترا .. من المدينه قبل زفافها #بشهر ... طبعاً لو رجعنا للقصه الاصليه ... فالشهر دة اللى بتسافره كاجول للندن قبل زفافها وهناك بتقابل شاروخان .. الشاب الفاشل هو كمان
- الفيلم نصه الاول اتصور فيه مومباى ونصه التانى اتصور فى بنجاب تحديدا فى شانديجرا وامبالا ... لو نفتكر الفيلم الاصلى نصه الاول اتصور فى لندن ونصه التانى فى بنجاب ...
- اسقاطات الشخصيات كانت معقوله مع فروقات بسيطه ... يعنى عجبنى دور فارون فى انه رغم انه مستهتر وفاشل ... الا انه راجل جدا بخصوص اللى بيحبها ... وعاليا مكانش ليها علاقه بكاجول اصلا ... نو واى اقارن بينهم من حيث الشخصيه ... بالاضافه لان فارون كان كل شويه مقضيها ندب وعياط .. على عكس شاروخان ... اللى كان هايجننا فى الفيلم بثقته بنفسه وقوته على طول الخط
- الفيلم فيه حس كوميديه حلو اوى ... عجبتنى المصايب اللى كان بيعملها كافيا وهامبتى سوا ... حقيقي خرجنى من اى مود ملل ... وقعدت اضحك على كل مواقفهم سوا
- الكيميا بين فارون وعاليا قويه من #SOTY وانا شخصيا بحبهم جداً مع بعض ... المشاهد الرومانسيه بينهم ناعمه اوى ... نظراتهم لبعض تقتل
- نهاية الفيلم كانت مسخره .. مش بس الشباب بيحاولوا يقلدوا شاروخان انما كمان البنات ... كان مشهد تحفه وعاليا بتقلد شاروخان وبتفتح دراعاتها وتقولك احنا بنعيش مره وبنموت مره وبنحب كمان مره ...
- فارون ماينفعش يعيط خالص ... كل ما يعيط انا بضحك ... ادمن #مى علقتلى على عياط فارون ... وقالتلى ... عامل زى الوليه اللى دلقت اللبن وقاعده تعيط جنبه ... وطبعاً انت عارفين ادمن مى مصيبه فى تعليقاتها
- فارون كان دوره كبائع فى مكتبه ... هو قضى فتره فعلا يشتغل فى محل لبيع الكتب عشان يتدرب على دوره .. ودة شئ يُحترم وجدير بالذكر ..
- الفيلم من اخراج شاشنك خايطان ... ومن انتاج شركة دراما برودكشن لكاران جوهر ...
#سلبيات
- اكبر سلبيه وقعت الفيلم انه ريميك لفيلم مينفعش يتعمله ريميك ...
- معجبنيش ستايل شعر فارون فى الفيلم ولا هدومه بصراحه .. فكرنى بستايل ثلاثى سمير وشهير وبهير لما رجعوا بالزمه سنة 70 ... المفروض انه ولد موديرن ... شعره عامل كدة ليه ... شكله كان غريب جدا رغم انه موز ... فا بصراحه مكنش موفق ابداً فى ستايله ... شاروخان نفسه كان روش اكتر من فارون لما عمل الفيلم من ستين سنه
- الفيلم فيه مشهد كامل فاضح ... مكنش له اى لزمه ... مش فاهمه انا عروسة ايه اللى باقى على جوازها شهر ورايحه تعيش حياتها وتعمل علاقه كامله مع شخص #المفروض انها مش هاتتجوزه ... معرفش اى اللى حصل لمعايير وقيم الهند الراقيه ... ومعرفش ازاى حاجة زى كدة ميقفوش عندها ...
#الاغانى_الموسيقى :
موسيقى الفيلم عجبتنى ... كانت لـ Sachin–Jigar بالاشتراك مع Sharib Toshi وطبعاً كلاً منهم قدمولنا اعمال قويه ... زى ABCD - Any Body Can Dance .. وافلام تانى كتير ..
كلمات الاغانى كانت لـ Kumaar و Irshad Kamil ودول قدمولنا قايمه طويله زى Ra.One Aashiqui 2
الالبوم شارك فى غناؤه عباقره زى Arijit Singh Official Shreya Ghoshal Udit Narayan Official
بس معلقش معايا غير اغنيه Samjhawan ... فهى اغنيه متكامله ... اصوات وكلمات والحان ... حقيقي وهم ... عجبتنى اوى اوى اوى ...
طبعاً مش هنسي اتكلم عن تجربه عاليا الغنائيه ... وانها غنت Samjhawan بردو ... بس انا مش شايفه انها كانت ممتازه فيها ... يمكن لانى سمعت الاغنيه الاول بصوت شريا جوشال ... فاكان احساسي زى ما تاكل مانجه وتشرب بعدها كوباية قهوه ... وطبعاً شرادها كابور تفوقت بأغنية جوليان بصراحه ... وانا شايفه انها لايقه فى الغناء اكتر ...
#الفيلم_غير_صالح_للمشاهده_العائليه
تقييمى له 2.8/5
فيلم هيعجبكم ويسليكم لمره #واحده فقط