فيديا بالان
حبيبتشى حبيبتشى حبيبتشى خمسة حبيبتشى
لما بدأت اشوفلها افلام وكده وحبيتها وقعدت ادعبس وراها وعن حياتها وكده
عرفت انها مش قديمة ولا حاجة دى دخلت بوليود سنة 2005 يعنى يدوبك عشر سنين
فاستغربت امال ازاى كسبت المكانة والشهرة دى وبقت بتشيل فيلم لوحدها
سر حب اى حد ليها هو اختلافها عن بطلة الافلام الهندى التقليدية ..
هو ده مش دايما بس يعنى معظم ادوارها مختلفة
اللى بيتفرج على افلام فيديا هيحب الفكرة وتمثيلها وكده لكن هيضايق من شوية تجاوزات كده بس
عديها مش مهم هما اصلا كلهم انحرفوا مرة واحدة و بقوا ينسوا هدومهم ف البيت متعرفش ليه
لكن مظهر فيديا غالبا بيكون مظهر الست الهندية العادية تقريبا
فأنت يا أما بتحبها وبتحب تمثيلها وشايفة مختلفة .. يا أما انت مش هتحبها خالص وهتبطل تشوفلها اى حاجة ودى حاجة تخصك طبعا بس صدقنى هتخسر لان افلامها مش تافهة بالعكس ولا هى بتطلع اباجورة
بس حاول تقرا التقرير ده وتعرف اكتر عن حياتها الشخصية يمكن تغير فكرتك
نبدأ بقى ..
الاسم : فيديا بالان " غالبا بالان ده مش اسم العيلة ولا حاجة ده مجرد اسم مستعار "
واسم الدلع "فيدهى "
تاريخ الميلاد: 1 يناير 1978 " كملت النهاردة 37 سنة " لسه مش كبيرة اوى
"برج الجدى "
مكان الميلاد : بالاكاد في كيرالا "الهند"
الطول : 163 سم
الوزن : 60 كيلو بيزيدوا وبيقلوا
الديانة : هندوسية
الاب : P. R. Balan مدير علاقات عامة في قناة ETC
الام : Saraswathy Balan "سارسواتى بالان " ودى ربة منزل عادى يعنى
ليها اخت واحدة اسمها بريا بالان ودى بتشتغل ف الدعاية والاعلان
والممثلة بريا مانى تبقى بنت عمها من بعيد
فاكرين بريا مانى دى اللى عملت اغنية 1234 مع شاروخان ف فيلم شيناى اكسبرس
وجوزها يبقى سيدارث روى كابور المنتج " اخو اديتيا روى كابور الكبير " واتجوزوا ف ديسمبر 2012
يعنى بعد فيلم كاهانى عشان بس الناس اللى بتقول ان هو واسطتها ف بوليود
ده مش حقيقى هى مشهورة وناجحة من قبله
فيديا اول مرة مثلت فيها كانت ف مسلسل اسمه hum paanch سنة 1995
وكان عندها 16 سنة و بعد ما المسلسل نجح رفضت عرض المخرج انوراج
باسو لبطولة مسلسل عشان عايزة تركز ع الافلام
اهلها معترضوش ع فكرة انها تكمل تمثيل لكن اشترطوا انها تكمل تعليمها "العلم نور ... والنور بيقطع
" و دخلت الجامعة عشان تاخد البكالريوس ف علم النفس واخدته و بعده اخدت الماجستير من جامعة مومباى وكده كانت عملت الواجب وزيادة وعداها العيب و قزح
فيديا كانت بيتكلموا عندها ف البيت اللغة التاميلية و لغة الملايالام وعشان كده لما كبرت بقت بتتقن لغات زى الهندى والمهراتى والانجليزى والبنغالى " محدش يضحك "
المهم خلصت فيديا الماجستير و قدمت للاختبارات لفيلم مالايالم وكان اسمه Chakram
بس حصلت مشاكل بين صناع الفيلم والبطل والفيلم اتلغى
و صناع الفيلم اتهموها انها جابت لهم الحظ الوحش وان الفيلم باظ عشان هى نحس
برغم انهم كانوا ممضينها على ادوار ف 12 فيلم تانى بنفس اللغة دى بس استبدلوها بناس تانيين غيرها وقالولها مع السلامة طريقك اخضر
فيديا من الممثلات اللى اترفضوا كتييييييييييييرررررررررررررر اوووووووووى ف ااول حياتها لما فكرت تدخل التمثيل
وبعد كده راحت تمثل ف السينما التاميلى و اخدت دور فعلا ف فيلم اسمه n.lingaswamy
وبعد ما خلصت تصوير دورها المخرج معجبوش ومسح دورها واستبدلها بواحدة تانية تعمل الدور
وبعدها اخدت دور ف فيلم كوميدى تاميلى تانى بس الدور كان وحش اوى واضطرت تسيب الفيلم
تقوم فيديا تيئس
ابدااااااااا ...
تحس انها نحس ..
خاااااااالص
راحت بعد كده مضت فيلم تاميلى تالت اسمه manasellam
كان سنة 2003 بس المخرج استبدلها بممثلة تانية وقال انه مش مرتاح ف الشغل معاها وان تمثيلها مش عاجبة
تيئس فيديا وتتعقد
ابداااااااا واطلاقااااا
راحت بعد كده عملت فيلم اسمه kalari vikraman
وكملت دورها بسلام وخلصت تمثيل "هييييييييييييه اخيرا "
بس حصل مشاكل والفيلم متعرضش ف السينما ولا نزل اساسا
هييييييييييح قليل البخت يعضه الكلب ف المولد
وبعدها بقى يئست بجد لانها فشلت تدخل التمثيل
وراحت اشتغلت ف الاعلانات والفيديو كليبات
عملت بتاع حوالى 60 اعلان تليفزيونى و اشتغلت فى فيديو كليبات مع مطربين واغلبهم كانوا من اخراج المخرج براديب ساركار
ف 2003 عملت فيلم بنغالى اسمه bthala heko
وده الحمد لله الناس شافته وخدت عليه جايزة كمان
ركزوا معايا كل ده فيديا مدخلتش بوليوود ولا عتبتها اصلا
ف 2005 المخرج براديب ساركار اللى هو كان بيخرجلها الكليبات عرض عليها بطولة فيلمه Parineeta مع سيف على خان وهى طبعا ما صدقت
المهم قبل ما تعمل الفيلم فضلت ف اختبارات بتاع حوالى 6 شهور وراحت تقرا الرواية اللى فيلم بيجسدها واتقان متناهى عشان تطلع كويسة ف الدور وبالفعل كل النقاد حبوها وحبوا دورها واتنبئولها بمستقبل كويس واترشحت عنه لجوايز افضل ظهور وافضل ممثلة وكده يعنى
وبكده دخلت بوليوود بعد عناء
جه السنة اللى بعدها عملت فيلم lage raho munnabhai مع سنجاى دات والمخرج راج كومار هيرانى والفيلم نجح جدا وكان بلوك باستر وحاجة عليها القيمة والدنيا ابتدت تضحكلها تانى
و ف 2007 عملت دور ف فيلم لمانى راتنام وكان اسمه جورو مع ابهيشك باتشان وايشواريا راى والفيلم كان كويس بس النقاد قالوا ان موهبتها مكنتش موجودة ف الدور ده بس يمكن عشان هى مكنتش بطلة
و بعدها فيلم salaam e ishq وكان دورها قصاد جون ابراهام والفيلم فشل تجاريا و من النقاد كمان لكن اثنوا على دورها
وبعدها اخدت دور مساعد ف فيلم ek lavaya مع اميتاب باتشن وسنجاى دت وشارميلا تاغور وبومان ايرانى وسيف على خان
الفيلم فشل ف الايرادات بس دخل الاوسكار
وبعد كده اشتغلت مع المخرج ساجد خان ف فيلمه heyy babyy مع اكشاى كومار و فاردين خان وريتش ديشموخ والفيلم نجح جدا تجاريا لكن النقاد معجبهمش دور فيديا
وبعده فيلم bhool bhulaiya وكان اعادة لفيلم قديم وكان معاها شينى اهوجا و اكشاى كومار واميشا باتيل
والفيلم نجح
والنقاد عجبهم دورها كمان
ف 2008 عملت فيديا فيلمين كانوا halla bol مع اجاى ديفجان وبانكاج كابور وده فشل ...
والتانى كان kismat konnection مع الوسيم شاهد كابور وده كان الى حد ما كويس لكن النقاد معجبهمش دور فيديا وقالوا انها عملت الدور ده قبل كده ومكنش لازم تعيده
2009 و 2010 عملت فيديا فيلمين الاولانى كان paa مع ابهيشك باتشان والفيلم نجح واعجبوا بدورها واعتبروا نقطة تحول ف مسيرتها الفنية وقارنوها ب دمبل كباديا واخدت عنه جوايز كتيرة واترشحت لاحسن ممثلة
والتانى كان فيلم ايشقيا مع ارشاد وارسى ونصر الدين شاه وبرضه اترشحت فيه لجايزة احسن ممثلة واخدت جايزة احسن ممثلة برأى النقاد
وقالوا كمان ان بوليود ظهر فيها ممثلة كويسة احسن من عرايس باربى اللى مسيطرين ع الافلام كلها
وف 2011 و 2012 عملت فيديا فيلمين من الافلام المفضلة بالنسبالى والاولانى كان no one killed jessica مع رانى موخيرجى والفيلم نجح وفيديا اترشحت برضه لجايزة افضل ممثلة
.. والناس استغربت ان الفيلم نجح من غير بطل .. وقالوا ان رانى وفيديا فعلا قدروا يشيلوا فيلم لوحدهم
والتانى اللى كان ف 2011 برضه كان اسمه the dirty picture
انا مشفتوش بس هم بيقولوا ان دورها كان كويس جدا واترشحت فيه برضه لجايزة افضل ممثلة
انا بينى وبينكم لما شوفت البوستر بتاعه اتوغوشت
بس اللى عرفته عن الفيلم ده ان هى كانت بتجسد فيه قصة حقيقة لممثلة هندية وكانت دى قصة حياتها وانها اتقنتها جدا وعشان كده اخدت عليها جايزة افضل ممثلة واللى متعرفوهوش ان فيديا عشان الدور ده زادت وزنها 12 كيلو
وف 2012 كان كاهانى فيلم من احلى افلام بوليود .. فيديا كبرت ف نظرى وهى طالعة اغلب الفيلم من غير مكياج وفستان الحمل اللى كانت لابساه وماشية تتكعور بيه
حتى الشعر يأما مربوط يأما الضفيرة".زى رانى ف ماردانى بالظبط " والفيلم نجح جدا وهى اخدت جايزة احسن ممثلة
وف 2013 كان ليها فيلم واحد مع عمران هاشمى اسمه ghanchakkar و الفيلم فشل وكمان النقاد معجبهمش الدور
وف 2014 فيديا كان ليها فيلمين الاولانى كان shaadi ke side effects Side مع فرحان اختر وده اثار جدل
للنقاد ناس حبته وناس لاء حتى ايراداته كانت متوسطة
كالعاده اداءها كان قوى ..
والتانى كان بوبى جاسوس وده فشل خااااااالص ف الايرادات لكن من وجهة نظرى انا كان حلو بس مش دى فيديا
من اشهر الحاجات اللى بتقولها فيديا انها بتحترم النقد طالما بيوجهها للطريق
الصح
وبتقول انها نفسها تمثل مع شاروخان وانها معجبة بيه وعايزة تبقى الزوجة التانية ليه ومرة قالت كمان انها على استعداد تقتل جورى وتاخد شاروخان هى
وبتستنى اى سيناريو كويس عشان تمثل معاه وبرضه بتقول انها بتحب سلمان وان هو المفضل ليها هى بتمسك العصاية من النص
ومن اشهر اقوالها برضه لما سألوها ليه بتختار الادوار دى بالذات وقالت ان شغلها هو انعكاس لشخصيتها وافكارها وقيمها وانها اتربت على انها تقدر تعمل اى حاجة مهما كانت صعبة وعشان كده دايما بتختار الادوار الصعبة وانها بتحب احساسها بالنجاح والانتصار بعد كل دور بينجح ليها
بيقولوا عليها خليفه عامر خان وماشيه على نهجه و مغلطوش
فيديا داوقتى واحدة من ممثلات بوليود اللى بيتعملهم حساب رغم فشلها ف الاول ورفض صناع السنيما ليها بس الفشل مش نهاية الدنيا والقلم اللى بناخده بيصحينا وبنتعلم منه وهى عملت كده
اتجوزت سيدارث روى كابور ف 14 ديسمبر 2012 فى باندرا ف مومباى
فيديا عملت 40 تجربة قدام الكاميرا و17 مشهد من غير تصوير كاختبار ليها قبل ما يختارها المخرج لفيلم بارينيتا
هوايات فيديا بتروح للاعمال الاجتماعية واشتراكها ف اكتر من منظمة لمرضى نقص المناعة والايدز وادمان المخدرات
وكمان بتحب القراءة جدا
ممثلها المضل اميتاب باتشن ومورجن فريمان
وممثلتها المفضلة جوليا روبرت وكات وينسلت
لونها المفضل الاحمر
واكلها المفضل الاكل البيتى العادى
اجر فيديا بالان ف الفيلم الواحد حوالى من 4_5 كرور وثروتها كلها 90 كرور
فيديا عندها نوع من الوسواس القهرى بالنسبة للنظافة
مش بتشرب خمره لكن معروف انها ساعات بتدخن
فيديا من نوع الستات اللى بتوفق راسين ف الحلال
ومعظم اصحابها هى اللى مجوزاهم
معروف عنها برضه انها من اشد المعجبين بباولو كويلو وانها قرت كل كتبه تقريبا
فيديا ف مشوارها ف بوليود اخدت 52 جوايز متعدده من جهات مختلفة منها جوايز وطنية وجوايز من الفيلمفير و سكرين وزى سينى وستار جيلد وغيررهم
بالنسبة للفيلمفير فهى تعتبر اكتر واحدة اخدت جوايز فيها .. فيلمها parineeta اخدت عنه احسن ظهور لاول مرة و ishqiya اخدت عنه احسن ممثلة باراء النقاد و اخدت احسن ممثلة 3 مرات عن ادوارها ف paa و the dirty picture و kahaani