انوشكا قدرت تكون واحدة من اهم نجمات بوليود رغم سنها الصغير وصغر الفترة من اول ما بدأت لحد النهاردة
انوشكا من مواليد 1 مايو سنة 1988 من اسرة عسكرية ف بنجالور
ابوها كان عقيد ف الجيش واسمه اجاى كومار شارما
وامها اشيما شارما ست بيت وعندها اخ واحد اكبر منها اسمه كارنيش لاعب كريكت وبيشتغل ف البحرية التجارية
عيلة انوشكا الكريمة مش بتتفرج على افلام بنتهم لانهم مش متابعين الافلام من اصله ولا حتى كانوا موافقين انها تمثل بس هى اصرت
انوشكا اتعلمت ف مدارس تبع الجيش ولما كبرت دخلت كلية الفنون ف بنغالور واتخصصت ف الادب وبعد ما اتخرجت سافرت مومباى عشان تشتغل ف الازياء واشتغلت فعلا وعملت عروض ازياء كتير واعلانات للازياء والمجوهرات والدنيا بقت زى الفل
واشتهرت ف عالم الازياء بابتسامتها الجميلة
دخولها بوليود كان لما اديتيا شوبرا عمل اختبارات تمثيل عشان يختار بطله لفيلمه وهى راحت الاختبارات واختارها اديتيا رغم كل اللى راحوله عشان هى الوحيدة اللى كانت واثقة ف نفسها قدامه على عكس الباقيين
طبعا هو مكنش عارف ان مصدر ثقتها قدامه دى انها متعرفوش ولا تعرف هو مين ومعرفتش الا لما اتقبلت واتصدمت لما عرفت انه مخرج ديوالى دولهانيا لى جانجى اللى هى كانت بتتفرج عليه وهى صغيرة
وخدت الدور وعملت راب نى بنادى جودى مع شاروخان والناس حبتها وحبت اداءها ف الفيلم وخدت جايزة افضل ظهور لاول مرة وافضل ثنائى مع شاروخان
ولانها محظوظة كان تانى فيلم ليها badmaash company مع شاهد كابور وبعده بقت انوشكا ضلع ثابت ف بوليود ومنافس قوى لناس كتير
عملت بعده فيلمين مع رانفير سينغ كان هو لسه جديد ومحدش يعرفه غير الست الوالده وبصراحة هى اللى كانت شايلة الفيلمين وكانوا band baaja baaraat و ladies vs ricky bhl
وبعدهم عملت مع اكشاى patila house
وبعد كده وقوفها التانى قصاد شاروخان وفيلم jab taak hai jaan وكان تانى نقلة ليها رغم انها مكنتش البطلة وبالدور ده كانت وجه شاب اتبناه راج شوبرا قبل ما يفلسع وخدت عن دورها جايزة احسن دور مساعد
وبعد كده اشتغلت مع عمران خان ف فيلم matru ki bijlee ka mandola وده فشل خاالص
وبعد كده تعاونها مع عامر خان فى فيلم pk ودورها فيه كان السبب الاول والاخير انها خدت جايزة ملكة البوكس اوفس لانه كان فيلم السنة من حيث الايرادات
وهى دورها كمان كان كوويس جدااا مكنتش اباجورة على عكس ما كنت متوقعة
2015 انوشكا ليها 3 افلام
اولهم كان فيلم NH 10 وده نزل ف شهر 3 وكان بطولة مطلقة ليها والفيلم نجح من حيث الايرادات وكمان عجب الناس ونالت عليه اشادات كتيرة
وفيلمها Bombay velvet مع رانبير كابور وده يعتبر من اكتر الافلام المنتظرة ف 2015
وفيلمها dil dhadakne do مع بريانكا ورانفير وفرحان
فى بداية مسيرتها كانت مرتبطة برانفير سينغ وانفصلوا علطول يدوبك هى سنة واحدة
وبعدين اتربطت بفيرات كوهلى لاعب الكريكت المشهور وهيتجوزوا السنادى