تحيا الانسانيه Jai Ho
***************
سلمان خان .. بعد انقطاع دام حوالى عام ونص .. يعود الينا بالفيلم اللى انتظرناه طويلاً .. #Jai #ho الفيلم لم يأخذ مساحه اعلانيه او دعائيه او ترويجيه كفايه قبل عرضه .. ودة حاجة استفزتنا كتير ان ليه سلمان مأجل ترويج الفيلم لقبل ايام من عرضه .. ولكن تقريباً دى اللى بيسموها الثقه .. فلو كان عندك رساله هتوصل حتى لو لم تتحدث .. وللى ميعرفش سبب انخفاض ارباح الفيلم هى ان سلمان خفض سعر التذاكر للنص عشان اكبر عدد من الناس تشوفه لانه قال رسالة الفيلم اهم من ارباحه ..
مش عايزه اطول عليكم ... هدخل فى الفيلم علطول :
#القصه :
بتدور قصه الفيلم حول الشاب جاى .. اللى مؤمن بمبدأ وبيحلم انه يجعله "ايدولوجيه " اسلوب مجتمع .. وهو انك تساعد غيرك بدل ما تشكر اللى ساعدك .. وكما يقولون .. #سلسلة #الحب #لا #تنتهى .. ويواجه مشاكل من الفاسدين فى السياسه ودة اللى بيحطه فى مواقف محرجه كتير ..
#النجوم :
#سلمان #خان : جاى
#تابو : جيتا
#ديزى #شاه : بينكى
#جينلينا #ديسوزا : سومان
#سونيل #شيتى : الظابط ارجون
#دانى #دينزوجابا : الوزير فيلان
#الاداء :
سلمان خان : يمكن دة اكتر دور متعبوش فى اداؤه .. رغم انه الاقوى على الاطلاق .. لانه وبمنتهى البساطه سلمان قرر يصورلنا كام يوم من حياته الطبيعيه .. فالمعروف عن سلمان انه بيعشق مساعدة الاخر اياً كان هو مين ... ومش هنساله موقف انه لغى احد ايام تصويره عشان يقضى يومه مع بنت عاجزه كان حلمها انها تشوفه فقط ... وحبيت كمان ان الشخصيه مش مثاليه ولا كامله .. لا .. دة شاب غاضب عنيف مطرود من الجيش .. عنده مبدا وهينفذه ولكن بطريقته هو .. عشقه واحترامه لاخته جيتا .. كان اعمق قصة حب فى الفيلم كله
تابو : اخخخ منك يا تابو .. الحنان والقوه والذكاء والرونق والجمال .. هى اخت جاى الكبيره وبمثابة امه .. تابو ادائها كان فى قمة العبقريه والبساطه .. وكنا كلنا فى منتهى الحنين لاننا نشوف ليدى بوليوود من جديد تانى ..
ديزى شاه : البنت دى شبه رانى اوى ... بمجرد ما شفتها قولت ايه اللى جاب القلعه جنب البحر ... بس طبعا مع فارق التشبيه ... دورها كان عادى ... وكويس انهم لم يبالغوا فى الممثله فا وجه جديد قام بالدور وكفى ... مكانتش مؤثره فى الفيلم ولا نهايته هى ممكن نقول فاكهه فى الفيلم ... عشان يعرفوا يضيفوا حته رومانسيه على الاحداث الدراميه اللى دايره .. بس ادائها كان ناعم وجميل .. حبيتها اوى ..
جينلينا ديسوزا : فتاتى الجميله ... طول عمرها شقيه وبتتخانق اول مره اشوفها فى دور مكسور ومغلوب على امره ... واول مره تطلع بدور فتاه عاجزه ... حبيتها اوى واختيارهم كان موفق جداً ليها .. ورغم ان دورها كان صغير بس يمكن فجر جوانا كلنا ... غضب لما بتموت فى الفيلم
سونيل شيتى : فكرنى بنفسه فى Main Hoon Naa ظابط الجيش مع فرق انه هناك كان شرير وهنا طيب .. ولكن يبقى الجبروت واحد ... جبروت سونيل شيتى .. دوره كان صغير بس فرق كتير فى الفيلم .. وفى النهايه بتاعته ..
دانى : الراجل دة تقيل دايماً وعلطول تلاقوه الرجل الغامض بسلامته زى دوره فى فيلم #Luck وفيلم Acid Factory او الصديق الشجاع زى فيلم Ashoka وهنا كان الوزير الشرير الغاضب .. وادائه كان رائع كالعاده ..
#تحليل :
- #يحسب للفيلم حاجات كتيره هناخدها تباعاً :
- الكاست العبقرى للفيلم .. من الافلام القليله اللى تلاقيها مليانه نجوم من الزمن الجميل زى كدة تابو وسونيل ودانى وسلمان ... كاست موفق جداً يخليك سعيد طول مانت بتتفرج على الفيلم
- رسالة الفيلم قويه ... بتهدف لتنمية مجتمع صالح ذو قيم ... وهى دى بوليوود القديمه اللى كانت بتتكلم عن الشجاعه والتضحيه والحب .. مش مقاسات البكينى والمشاهد الساخنه ... فهو فيلم من زمن جميل حتى الاسلوب الراجل الشرير والبطل الهمام .. والناس اللى بتيجى تساعد اخر الفيلم حسيت انى قدام كلاسيكيه من بتوع 1990 ..
- الفيلم رغم قصته الدراميه ... فهو فى لمحه كوميديه انا حبيتها جداً .. ولمحة رومانسيه عشان الهنود يحبوه جداً ... استغربت ان فى ناس بتقول ان الفيلم كان كله رومانسيه ... هى فين لا مؤاخذه !!! ... دول حتى سابوا النهايه مفتوحه مقالوش اتجوزوا ولا قالها من ساعة ما عرفتك وهى خربانه فوق نفوخى ... فالفيلم كان موزون ومخرجش عن اطاره ولا فقد رسالته فى النص
- الفيلم من اول مشهد لاخر مشهد صالح للمشاهده العائليه .. يعنى تقدروا تجمعوا اهلكم وتقعدوا مع بعض تشوفوا فيلم هندى ذو قيم ومفاهيم تليق .. وصالح جداً للأطفال .. لانه مش صعب ..
- تصوير الاغانى عجبنى .. فيه كلاسيكيه ورومانسيه فى منتهى الجمال
- نهاية الفيلم عجبتنى .. وهى تطبيق عملى لمثل "اعمل الخير وارميه فى البحر هيرجعلك" ... كل الناس اللى ساعدها جاى فى الفيلم وساعدها الاشخاص اللى اتبعوا اسلوبه .. كانوا سبب نجاته فى النهايه ..
يحسب #على الفيلم نقط نناقشها بردو :
- الافوره .. لوهله سلمان وبمنتهى تلقائيته حسيته بيأفور فى مشاعره ... فى مشهد لما الراجل هدد جيتا اخته وقالها هاتى اخوكى ... هو معملهاش حاجة تستاهل السلو موشن والعياط منهم .. دة فى الافلام القديمه كانوا بيبهدلوهم واغتصاب وضرب وتعذيب ويخش البطل يشيلها ويمشى عادى يعنى ...
- نقلات المشاهد .. حقيقى جابتلى اكتئاب .. لو المشاهد مقصوصه بمقص تلم .. مش هتبقى نقلاتها بالسوء دة ... ودة عيب اخراج للأسف ..
- الاغانى .. حسيت كتير ان فى اغانى ملهاش لزوم انما حشو .. وخصوصاً ان قضية الفيلم لا تحتمل اغانى .. لو اتقدم زى Kahaani فى حتة الالبوم كان هيكون افضل كتير ..
- الافوره تانى .. سلمان خان ضرب نص الهند فى الفيلم لوحدة .. يرضى مين دة يا مؤمن .. وكان واخد رصاصه فى الكبد والتانيه فى الرئه وسكينه كامله فى عمودة الفقرى عدل .. وبيضرب وزى الفل بردو .. ايه الاوفر دة ... هما اها عايزين يقولوا ان الغضب بيولد قوه ... بس مش كدة !!! ونرجع تانى نقول دة عيب اخراج !!!
- بأختصار : سهيل خان كان ثغرة الفيلم الوحيده .. فهو مخرج تعبان بكل المقاييس .. ده السبب اللى خلاه مش قادر ينافس افلام تانيه بنفس القوه .. لا القصه ولا الممثلين ولا الهوا .. المخرج بيشيل نص الفيلم ... وجاى هو كان محتاج مخرج محنك فاهم امتى يقول اكشن وامتى يقطع وازاى يحرك الممثلين .. سهيل مش شاطر اصلاً ... الفيلم كان محتاج كاران جوهر .. وكان هيبقى فيلم مكتمل ... فعلاً ...
#الالبوم :
الاغانى معلقتش معايا .. اللى عجبتنى اوى هى :
"Tere Naina Maar Hi Daalenge" الاغنيه دى تحفه ... كلماتها تحفه واللى يخليك تعشقها من قبل ما تسمعها انها ديو بين اتنين عباقره Shreya Ghoshal Shaan لما شان وشريا يغنوا سوا ... لازم نقف واحنا بنسمعهم ..
الفيلم مش بنصحكم تتفرجوا عليه .. انما تذاكروه
الفرجه لوحدها مش كفايا
وياريت نطبق المبدأ دة فى حياتنا :
"بدلاً من ان تقول شكراً .. ساعد ثلاث اشخاص .. واجعلهم يفعلوا هذا ايضاً "
الفيلم صالح للمشاهده العائليه
تقييمى له :
4/5 وكان يستاهل اكتر .. بس الاخراج غلطه لا تغتفر ..
#الفيلم #يعبر #عن #رأيى #الشخصى