ان ضحكت فهذا افضل .. Hasee Toh Phasee
*****************************
واخيراً .. وبعد مشاهده دامت 15 يوم .. خلصت فيلم هاسى توه فاسى .. مبروك
#القصه:
بنت بتطردها عائلتها من سبع سنين .. وبترجع قبل فرح اختها بسبع ايام .. وبتورط معاها خطيب اختها فى قصتها .. !!!
#البطوله :
بارينتى تشوبرا : ميتا
سيدهارث مالهوترا : نيخيل
#الاداء :
بارينتى تشوبرا : هى دى بارينتى بتاعة عشق زاد ؟؟ ... مش مصدقه ... اختيارها للدور كان ضعيف ... ادائها فى النص الاول للفيلم قمه فى المبالغه دة حتى مدمن المخدرات مبيبقاش كدة ... فى النص التانى من الفيلم .. ادائها بيتحسن .. ومع نهاية الفيلم ادائها بيبقى عبقرى .. تقريبا بتندمج فى الدور ... افضل مشهد عملته مشهد المطار .. يعنى نقدر نقول ان ادائها كان بيتحسن على طول خط الفيلم .. وانت من سئ جداً .. الى جيد .. الى رائع .. بس نرجع ونقول .. بارينتى اقوى من انها تقدم دور ضعيف زى دة ...
سيدهارث مالهوترا : هو دة الواد اللى انت بتحبوه .. ولا فارون داون اللى بتحبوه ... .. عشان معكش بس .. ادائه على طول الفيلم ثابت .. منتهى البرود من اول الفيلم لاخره .. يعنى عكس بارينتى خالص .. هى كانت مبالغه وهو كان بارد .. وبيحاول يقلد شاروخان ... ميعرفش انه بيلعب بالنار لان محاولة تقليده لشاروخان هتخليه يفشل مش اكتر .. محبتوش ولا تقبلته شكلاً ومضموناً .. حسيت وجوده زى عدمه فى الفيلم .. الشخصيه نفسها سلبيه .. والاداء بارد .. معجبنيش
#تحليل :
- اول ساعه فى الفيلم انت قاعد محتاس مش فاهم فى ايه .. مين اللى راجعه واختها بتخبيها ليه .. مشاهد الفلاش باك مش واضحه .. انت بتشوف مشهد من الماضى ومشهد من الحاضر .. وتحس ان الاتنين ماشيين مع بعض .. فاهتبقى تايه كدة !!
-الحيره هتلازمك طول الفيلم .. شويه هتتعاطف مع ميتا .. وشويه هتشوف انها تستحق اللى هى فيه .. وشويه هتحس انها مجنونه وشويه عبقريه .. مشاهد ليها قمه فى العقلانيه .. ومشاهد تانى عاطفيه .. بارينتى قدمت كمية مشاعر فعلاً جميله فى الفيلم وبتثبت انها من اقوى النجمات القادمه للساحه .. بس تركز فى اختيارتها شويه ..
- حبكة الفيلم معجبتنيش .. شويه تبقى كويسه وشويه تقع .. مش مستقره ولا بتتحسن بشكل ايجابى ..
- الكيميا بين سيدهارث وبارينتى حلوه ... بس كانوا عايزين فيلم اقوى من كدة شويه .. وسيدهارث كان محتاج يتلحلح عن كدة فى الاداء حبتين ..
- من الاخر بارينتى شايله الفيلم كله من اول مشهد لاخر مشهد .. وهى سبب نجاحه بالكامل
- فى شويه مشاهد هتعجبكم فى الفيلم .. وحواراتها مع سييدهارث مسخره .. هتخليكوا تضحكوا ..
-السيناريو فى الفيلم جيد .. مش عبقرى بس مش مبتذل .. فى حاجات كتيره حلوه فى السيناريو ..
- مش عارفه ليه الفيلم كسر الدنيا وجايب تقدير عالى فى ال IMDb فى حين انه فيلم جيد .. مش اكتر ..
- نهاية الفيلم معجبتنيش .. لانها باختصار اتهرست قبل كدة مليون مره .. البطل اللى بيسيب العروسه فى نص الفرح والبطله اللى بترجع من المطار ... يا جدعان جددوا بقييييي
- الفيلم للمخرج Vinil Mathew ودى اول تجربة اخراج له ..... ومكانتش بطاله ..
#الاغانى :
اغانى الفيلم معقوله شارك فى الالبوم Sunidhi Chauhan Shreya Ghoshal
معلقش معايا غير اغنيتين :
"Punjabi Wedding Song"
"Manchala"
سيدهارث فرصته الاخيره معايا هى فيلم Ek Villain لو معجبنيش هفكنى من متابعته خالص ..
#تقييمى للفيلم
3/5
فيلم مشاهده مره واحده ..
#صالح للمشاهده العائليه ..