انتِ ملكة .. Queen
**************
كانجانا رانوت ... فى سياحة فتاة ... ظن الجميع انها تحطمت بعدما تم الغاء زواجها ليلة زفافها ... ولكنها ملكة ... والملكات لا يعرفن سوى الانتصار
هو دة ببساطه فيلم كوين .. فيلم بقدر نعومته بقدر قوة رسالته .. الفيلم التانى اللى اثار الجدل فى 2014 بعد Highway .. يأما الناس طلعت بيه السما يأما مشاهدين اخرين قالوا انه فيلم بناويتى ممل .. وكالعاده هحاول اقف فى النص واتخذ طرف الحياد وانا بناقش الفيلم دة ..
الفيلم بطولة :
كانجانا رانوت : رانى / كوين
راج كومار : فيجاى
ليزا : فيجاى لاكشمى
ميش بويكو : اوليكسندر .. سيكاندر
جيفرى هو : تاكا
جوزيف جيتوف : تيمى
لوبيز ماركو : مارسيلو
الاداء :
كانجانا : ناعمه .. حقيقي تركتنى فى حالة سحر وصفاء .. حتى صوتها مش عالى .. دايما على عكس الاراء .. عندى قناعه ان كانجانا هى بطلة الادوار الصعبه .. كل النجمات بيعرفوا يزعقوا ويصوتوا ويعيطوا ويرقصوا .. انما انك توصلى الالم والوجع بهدوء ونعومه .. دى كانجانا .. طبعاً كانت عبقريه فى فيلم Fashion .. والنقاد كلهم اشادور بدورها رغم انه كان ثانوى .. وهنا كمان .. ادائها لدور البنت المجروحه اللى خطيبها بيسيبها قبل الفرح بيوم .. وبدون ابداء اسباب .. اعتقد انها مصيبه على اى بنت .. كان رائع .. وتعاملها مع المها دة كان مفاجئه .. حبيتها جداً وضحكت معاها من قلبى .. 4.5/5
راج كومار : مشوفتلوش غير دوره فى Talaash وهو خير مثال للشاب الريفى .. اللى جاى من ارياف الهند .. دوره كان فعلا حلو .. الولد البسيط .. اللى بسبب ضغط اهله لغى زواجه بحبيبته .. وبعد فتره عرف غلطته وحاول يصلحها .. دوره كان بسيط .. واداؤه كان ابسط .. وصادق 4/5
ليزا : يخربيت سنينها .. بنت مسخره .. كانت وكما قال النقاد فاكهة الفيلم .. بنت هنديه بتعيش فى باريس .. شغاله فى فندق .. واحيانا فتاحه .. هى دى البنت اللى دعمت كوين فى رحلتها فى باريس .. دورها كان كوميدى جداً وصادق جداً .. وحبيتها اوى فيه .. وعلى فكره هى فيها شبه من انجلينا جولى ؟؟ ولا انا حوله 4/5
ثلاثى هولندا : 3 شباب واحد من روسيا وواحد يابانى وواحد فرنسى .. جمعتهم الظروف والالام وكونت بينهم صداقه متينه وهما دول اللى كانوا سند كوين فى رحلتها فى هولندا .. 3 شباب صادقين وحلوين جداً بظروفهم وردود افعالهم وكوميديتهم ... 4.5/5
تحليل :
- الفيلم متصور 45% داخل باريس .. 45% هولندا .. و 10% الهند .. ودة فى حد ذاته ايجابيه رائعه .. فانت دخلت سياحه فى بلدين من ارقى واجمل بلاد العالم وانت قاعد على الكرسى ..
- بداية الفيلم الاستعداد للفرح وفجأة الصدمه .. كانت حلوه اوى .. انا شخصياً تنحت وقولت لنفسى .. وبعدين !!!! .. هتسكر بقى وتموت منفجره .. ولا هيحصل ايه .. البدايه جديده ومشوقه عجبتنى
- مبدأ الفلاش باك المختلط مع الاحداث كان حلو .. يعنى النص الاول من الفيلم هو عباره عن احداث كوين فى باريس .. وقصة حبها مع فيجاى .. وكل شئ كان واضح وسلس .. يعنى انت قاعد فاهم ان دة فلاش باك او انك رجعت باريس تانى .. مش تايه ولا محتاس
- سير الاحداث عجبنى .. يعنى كوين بنت بتتعامل مع المها .. اتوجعت ولكن ماستسلمتش .. رغم انها بره ضعفت وبكت وحزنت .. ورغم كدة .. قدرت تعالج نفسها بنفسها .. دعم الاصدقاء عجبنى اوى .. حقيقى يا شباب فى اى مكان هنلاقى حد يحبنا ويكون صادق معانا .. واد ايه دة ساعد كوين انها تخرج من وجعها وتتعامل مع مأساتها ..
- نتكلم فى النص الاول بقى .. ويمكن دة بالنسبالى الجزء الاضعف .. فى باريس حيث بتتعرف كوين على لاكشمى .. روم سيرفس الفندق اللى هى كانت عايشه فيه .. واللى بتساعدها تخرج من وحدتها والمها .. للحظه لما شفت لاكشمى قولت بس .. كانجانا هتقلع وهتضرب السيجاره .. وشكراً .. وحقيقى مكنتش هكمل الفيلم لو دة حصل .. انما لا .. رغم كل محاولات لاكشمى لانها تدردحها .. الا انها فضلت محتفظه بمبادئها واحترامها لذاتها .. وهنا حاجة حلوه .. ان الحضارات مش بتشكل الانسان .. انت تقدر تعيش فى اى مكان حسب ثقافتك انت .. مش حسب ثقافة الاخر ..
- النص التانى والاروع على الاطلاق جزء هولندا .. بزحمتها ودوشتها .. وفتاه مع 3 شباب فى غرفه واحده .. ولكن كانوا 3 شباب قدروا يعرفوا ان دى صديق رابع حزين زيهم .. واتشكلت بينهم صداقه جميله ... مليئه بالمواقف الكوميديه ..
- الفيلم فيه شوية مواقف مسخره السنين :
- موقف لما بتبقى مع فيجاى فى التواليت وبتلملها هدومها وبتطلع تجرى وراها
-موقف لما ال3 ولاد بيقولوها اتفضلى نامى جوه واحنا هنام بره .. وتقوم الصبح تلاقي واحد منهم فى الاوضه عندها وهى عايزه تلبس تحت البطانيه ..
- موقف لما مارسيليو بيطلب منها قبله .. وهى مش عارفه بيعملوها ازاى وتقعد تفكر ..
- مواقف عميقه فى الفيلم :
- 3 مواقف لمسونى اوى اوى اوى اوى :
- لما اولكسندر بيقولها دة خطيبك بتقوله كان .. بيقولها وسابك بتقوله اها .. ويحط ايده على قلبه ويقولها فى هنا وجع ؟ .. وهى تبصله وتسكت ..
- موقف لما بتعرف مأساة تاكا .. وبتلاقيه قاعد يرقص عشان يضحكها .. وبتكتشف فى الوقت دة ان الفرح هو بالاصدقاء اللى بيحبوك بجد .. حتى لو متعرفهمش .. ناس كتير بنعاشرهم سنين وبنكتشفهم انهم الد اعدائنا .. وناس متعرفناش ويتمنولنا كل الخير ..
- موقف اخير .. لما بترجع الهند .. وتحضن خطيبها وتقوله شكراً ليك ..
- الفيلم بيقدم رسالتين فى منتهى الاهميه :
- الرساله الاولى : انتِ ملكه .. سعادتك مش هتقف على راجل ييجى يتجوزك .. او راجل باعك لاسباب تافهه .. انت فى ايدك تكونى ملكه ساحره .. الكل يتمناها .. قيمتك فى شخصك .. مش فى اى حد تانى ..
- الرساله التانيه : وهى مشهد لما بترجع لخطيبها وتشكره .. يمكن كتير منكم استغرب شكرته ليه على الوجع ؟؟ .... اها يا ساده على الوجع
احيانا اكتر ناس بتوجعنا بيمنحونا دروس لا يمكن ننساها مهما مرت السنين .. لولا انه سابها مكانتش اتحررت مكانتش قامت مكانتش اتعلمت تطير .. كانت هتفضل البنت المكسوره الخجوله .. انما بسبب جرحه كبرت اوى اوى اوى ..
حقيقى يستاهل الشكر .. وطبقين صينى فوق نفوخه
- الفيلم من اخراج فيكاش باهل ودى تجربته الاخراجيه الاولى ولكنه منتج Lootera Hasee Toh Phasee Bombay Velvet .. وطبعاً واضح مستوى الاعمال اللى بيشارك فيها ..
سلبيات الفيلم :
- السلبيه الوحيده اللى فى الفيلم هى ان لا الموسيقى حلوه ولا الاغانى ممكن تشدك .. يعنى الفيلم كان هيكتمل لو كانوا اهتموا بالموسيقى والاغانى بشكل افضل ..
الفيلم يستحق المشاهده بجد ... رسالته قويه اوى وهو من اقوى افلام 2014 .. وطبعاً ينضم لقائمه افلام التأمل والفلسفه العميقه ..
صالح_للمشاهده_العائليه
تقييمى
4/5
تقييم الموقع العالمى IMDb
8.7/10