قصة زواجى 2States Movie
********************
الفيلم الرابع لارجون كابور .. والتالت لعاليا .. واول فيلم يجمع هذا الثنائى معاً وخصوصا ان الاشاعات اللى بتقول انهم مرتبطين خلت انتظار الفيلم يكون على اشده .. بعد النجاح المبهر لعاليا فى Highway واداء ارجون الرائع فى GundayTheFilm .. نزل تو ستاتس .. ليمتعنا بكوميديا ساخره تناقش واقع مرير .. مش هطول عليكم .. نخش فى الموضوع علطول
القصه :
القصه بتدور حول شاب وفتاه بيقعوا فى الحب ولكن بيعيقهم انهم من بلدين مختلفين فى الهند واهلهم يمانعوا هذا الزواج نظراً لاختلاف الطباع ..
بطولة :
عاليا بهات : انانيا
ارجون كابور : كريش
امريتا سينغ : كافيتا
ريفاتى : رادها
رونيت روى : فيكرام
شيف كومار : شيف
الاداء :
عاليا بهات : الطفله اللى فرضت نفسها على ساحة بوليوود وبقوه .. بحب ضحكتها .. ادائها فى الفيلم كان بحجم الفيلم .. يعنى ادائها بالنسبالى اقل من هاى واى واعلى من ستودنت اوف ذا يير .. بحكم قصة الفيلم .. ضحكها وحبها وحزنها .. كان صادق ويدخل القلب بسرعه .. ممكن نقول 3.5/5
ارجون كابور : انا بحب الواد دة اجدعان .. ناس كتير كانت بتقول ان ارجون هو طفل بوليوود يعنى الرومانسيه كبيره عليه هو وحش شاشه لما الدور يتعلق بالشر او الكوميديا .. انما الرومانسيه دى صعبه .. ولكنه وكما قال النقاد هو حقيبة مواهب .. بالنسبالى ارجون كابور كان شايل الفيلم .. شخصيته كانت مش سهله .. فهو الشاب الغير سوى نفسيا بسبب مشاكل اهله وعلاقته المقطوعه بوالده .. خجله وانطوائيته وجبنه وخوفه .. وفى نفس الوقت اصراره ومحاولاته الجاده فى الارتباط باللى حبها .. دوره كان اكتر من رائع وفعلا عجبنى جداً وكان بالنسبالى ادائه ييجى فى المرتبه التانيه بعد عشق زاد .. وتقييمه له 4/5
امريتا سينغ : هى مثال للأم اللى بتحب ابنها جداً وفى نفس الوقت حما شريره وصعبه جداً .. دورها وادائها كان عبقرى قدرت تستفزنى لاخر قطره ..
ريفاتى ورونيت : اب وام انانيا دورهم كان بسيط جداً الاهل اللى عايشين فى جنوب الهند .. وكل حلمهم انهم يجوزوا بنتهم لشخص يحبها .. دورهم كان يدخل القلب بسرعه
شيف كومار : الراجل دة كان بالنسبالى اقوى اداء .. ولو اختاروا من الفيلم دة افضل دور مساعد هيكون شيف كومار .. الاب اللى عنده قصته الشخصيه اللى ماتكلمش 3 او 4 جمل طول الفيلم .. بس عصبيته واخطاؤه واصلاحه للموقف اخر فيلم .. كان عبقرى حبيته جدا جدا ..
تحليل :
- بداية الفيلم حلوه .. خناقة بين طالبة جامعه ومسئول المطبخ .. وفجأه بيتدخل واحد فاتخرج تتغدى معاه .. يا راجل .. البدايه خلتنى اتفرج على الفيلم وانا بضحك على الجرائه بتاعة انانيا ودهولة وخجل كريش
- الفيلم متصور فى 3 اماكن مختلفه وهم تشيناى وكلكم حفظتوها شارع شارع مع شاروخان قبل كدة .. ودلهى عاصمة القلوب .. ومعهد IIM-A
يعنى فيلم انتاج هندى صميم .. متصورش برا الهند
- الفيلم مأخوذ عن روايه 2 States: The Story of My Marriage للكاتب الجميل Chetan Bhagat وهو اللى كاتب الروايه اللى اتاخد منها بردو فيلم 3 Idiots Movie ..
- الفيلم قصته مش جديده الاهل اللى رافضين زواج ابنائهم قصه مهروسه .. بس هنا سلط الضوء على حاجة مهمه وهى .. التعصب العرقى .. واد ايه اننا بنتمسك بحاجات سخيفه زى الجنسيه او انواع الاكل .. وممكن بسببها نخسر ناس وندمر بيوت كان ممكن تتبنى بالحب .. واد ايه فعلا التعصب دة شئ سئ جداً فى كل مجال ..
- عاليا عملت كام مشهد حلوين اوى اوى اوى .. منهم المشهد اللى فيه سابت ارجون فى المطعم بعد ما اكتشفت كدبه .. وادائها لما راحلها الشغل .. البنت دى هيبقى ليها مستقبل جميل فيما بعد ..
- ارجون كان متألق فى مشاهده مع ابوه .. نظرات التحدى والسخط .. كان جبار .. واداؤه فى مشهد لما راحلها سكنها وقالها مش هينفع نذاكر سوا تانى ... قعدت اضحك ضحك عليه ..
- الفيلم من اخراج Abhishek Verman .. ودى تجربته الاخراجيه الاولى وقبلها كان مساعد مخرج فى 3 افلام My Name Is Khan Jodhaa Akbar Humko Deewana Kar Gaye .. واعتقد انه نجح جداً من حيث الاخراج .. وكانت بدايه مبشره له
- امكانية ان الفيلم هو قصة بيحكيها ارجون بعد حوالى سنتين جواز عند دكتوره نفسيه .. كانت جديده فى فيلم هندى .. شفتها قبل كدة فى افلام اجنبي انما هندى لا .. وخصوصا انى طول الفيلم بقول ان هما متجوزوش وبالتالى هو بيتعالج بقى .. انما اخر مشهد لما نلاقيه مجرجر عربيتين العيال ... حاجة فرحتنى اوى اوى
- كلمات الاغانى كانت رائعه واللى كاتبها هو Amitabh Bhattacharya وطبعا هو كاتب عبقرى وكتب اغانى افلام كتير زى انجانا انجانى وبارفى وديوانى يه جوانى .. ودهوم3 وهاسى تو فاسى .. وقايمه طويله جداً من الافلام اللى انتوا بتعشقوها
- من المشاهد اللى خلتنى اعيط فى الفيلم وعاليا طالعه سلم المعبد .. ومن فرحتها وعدم تصديقها قعدت تعيط ومش قادره تطلع .. ولما ابو كريش حضر الفرح عشان يتمم جوازه فى مفاجئه جميله .. قعدت اعيط كتير اوى
- ارجون وعاليا بينهم كيميا جيده احيانا بتقلب فيزيا مع مشاهد خادشه للحياء
سلبيات :
- الفيلم فيه مشاهد فى منتهى الابتذال .. حقيقي مكانش ليها اى لزمه ولم تضف للفيلم غير نقطه سوداء
- موسيقى الفيلم الى حد كبير معجبتنيش .. كلها عاليه وطبلتها عاليه جداً حتى الاغنيه الحزينه .. الموسيقى فيها صاخبه .. وبالمناسبه الموسيقى كانت لـ Shankar Eshaan Loy .. وهو موسيقى عبقرى بردو عمل موسيقى افلام كتير زى كال هو نا هو وكابهى الفيدا نا كاهينا .. وماى نيم از خان .. وقائمه طويله بردو ..
الاغانى :
زى ما قولتلكم فوق الكلمات عبقريه لـ اميتاباتشريا .. والموسيقى لشانكر ايبشان روى جروب .. الكلمات اكتر من رائعه ولكن الموسيقى كانت صاخبة جداً
شارك فى الالبوم Arjit Singh
الاغانى كلها حلوه .. بس اللى علق معايا اوى
Locha-E-Ulfat : بالنسبالى كانت عبقريه الموسيقى كانت مناسبه جداً والكلمات جميله جدا جدا وكوميديه اوى
Offo : تحس انك عايز تقوم تتنطط وانت بتسمعها
Chaandaniya : فصلنى منها الموسيقى بس جميله جداً فى كلامها وتصويرها ..
تعرفوا بقى ان الالبوم كله حماده .. وفى اغنيه واحده هى احلى اغنيه فى الفيلم كله .. عارفين اغنية ايه ..
الميدلى اللى غنته ام انانيا فى الحفله بتاع KahOna pyaar hai الاغنيه دى ميدلى تاميلى على هندى .. بس عبقريه وكلاسيكيه وناعمه والموسيقى فيها تجنن .. ونظرات ارجون وعاليا لبعض وقتها كانت تحفه .. والاغنيه دى لو تفتكروا انتوا رفعتوهالى فيديو ..
المهم
الفيلم غير صالح للمشاهده العائليه ..
الفيلم جدير بالمشاهده وهيعجبكم وهتقضوا ساعتين لايت وحلوين ..
تقييمى 3.2/5 .. بسبب المشاهد الفاضحه فيه