حيدر ... Haider
التقرير هيبقى طويل شويه فاتحملوني لان للفيلم ابعاد ادبيه وسياسيه .. وبالتالي مفيش مقدمات .. مش وقت دلع هو
#لمحة_ادبيه:
الفيلم مأخوذ عن المسرحيه الخالده Hamlet للكاتب وليم شكسبير ... الروايه بتحكي عن امير الدنمارك هاملت اللى بيظهرله شبح ويحكيله انه عمه كلوديوس قتل ابوه الملك وبيتزوج والدة هاملت جرترود فى زيجه غير شرعيه وبيقرر هاملت الانتقام لابيه بعد ما بيصطنع الجنون امام عمه وامه لئلا يشك احد فى نواياه للأنتقام ... وبتؤيده فى ده حبيبته اوفيليا اللى بتموت منتحره نتيجه غرقها فى الحزن على موت ابيها لان هاملت بيقتله عن طريق الخطأ .. وبتنتهي الاحداث بقتل كلوديوس وجرترود واصابه هاملت بجرح قاتل من سيف مسموم ..
#لمحة_سياسيه :
كشمير .. الاقليم الذي طالما عاني من حروب داميه ومحاولات فرض السلطه عليه من قبل الباكستان والهند .. طيلة 60 عام .. راح فيها ارواح شباب كثر .. ووجد فيها مقابر جماعيه .. ومعتقلات تعذيب من الجيش الهندي منافيه لحقوق الانسان ومنافيه للأدميه على الاطلاق ..
* فهمتوا حاجة .. لا .. طيب فككوا من الهري دة وخشوا عالفيلم
اضربوا هاملت فى كشمير يطلعلكم حيدر .. ودة اللى قرر المخرج العبقري Vishal Bhardwaj انه يعمله بعد فيلمه قبول المستوحي من مسرحيث ماكبث وفيلم اومكارا المقتبس بمعالجه من مسرحيه عطيل او Othello لشكسبير بردو .. واضح ان شكسبير يبقى جوز خالته .. ماتستغربوش بس المرادي قرر يوسع دائرة التحدي في فيلمه الانجح حيدر ..
#الفيلم_بطولة:
تابو : غزاله مير - جرترود
شاهيد كابور : حيدر - الامير هاملت
كي كي مينون : كورام مير - كلوديوس
عرفان خان : روهدر - الشبح
شرادها كابور : ارشيا - اوفيليا
ناريندرا شاه : د.هلال مير - الملك هاملت
#القصه :
بتبدأ القصه سنة 1995 بأن الدكتور هلال مير بيستضيف فى بيته احد المتمردين ولكن تاني يوم بيكون اتبلغ عنه وبيتم تفتيش للمنطقه وبيتقبض عليه وبيتم نسف بيته .. ويختفي الطبيب تماماً .. الي ان يعود ابنه بعد كام يوم ليفاجئ بأن امه غزاله مع عمه كورام بيغنوا ومقضينها .. وبيقرر انه يدور عن ابيه .. لحد ما بيظهرله "روح" اللي ادعي انه كان صديق ابوه فى المعتقل وان ابوه اتقتل وبيوصيه بالانتقام .. وبيرجع حيدر ويدعي الجنون ويبدأ فى محاولات مستمره للأنتقام تنتهي بموت كل الممثلين ماعادا هو ..
#الاداء :
تابو : دورها كان اقوى دور فى الفيلم .. غطت على الكل حتي شاهيد نفسه .. كانت بتؤدي شخصيه الملكه جرترود .. او بصفه اصح .. دور زوجة الدكتور هلال مير واللي بتحب ابنها حد الجنون .. وبتتزوج من اخو زوجها .. دورها كان تقيل .. مليان وجع مليان خيانه .. رغم انك لطول الفيلم انت مش فاهم .. هي ايه .. هي فعلا شاركت فى قتل جوزها ولا مظلومه .. لو شاركت فعلا فاهو مش باين عليها .. ولو مظلومه ايه سبب زواجها من كورام .. ضحكة واحده كلها خبث بتنفي كل شكوكك .. وهى لحظة فوز كورام مير بالانتخابات ... مشاهدها مع شاهد كان كلها عظمه .. مشهدها فى النهايه وهي بتبوسه وبتقوله استلتم والا .. وبتودعه .. وهي بتقوله مفيش اقوي من وجع الام وابنها بيموت قدامها .. كان رائع .. ودة شئ طبيعي ومتوقع من تابو .. اللي زينت 2014 بفيلمين ومشاركتين جمال جداً .. جاي هو وحيدر .. ادائها يستحق 5/5
شاهيد كابور : شاهيد نضج .. ده اللى ممكن نقوله عن شاهيد بعد الفيلم ده .. اقوي اداء له على الاطلاق .. اقوي فيلم قدمه .. ومعرفش هيقدر يتفوق علي نفسه ويقدم الاقوي منه ولالا بعد كدة .. ادائه لشخصيه هاملت .. او حيدر الاديب الكشميري الساعي للأنتقام لمقتل والده .. المشتاق لامه .. اللى بتخونه وتتجوز عمه .. كان وهم .. ظهر فى الفيلم بـ 3 ستايلات مختلفين .. الموز ابو شعر حرير .. وكان عسول اوي .. والمجنون الاصلع .. وكان يخوف اوي .. والمتمرد الارهابي .. وكان مجنون اوي .. مش اى نجم يقدر يتحدي نفسه ويظهر بستايل "وحش" عشان يخدم الشخصيه .. او يتخلي عن شعره او مكياجه عشان يظهر الشخصيه باقوي مظهر .. عملها سلمان خان فى تيري نام وعملها عامر فى غاجينى وعملتها بريانكا وراني وفيديا .. بس انهارده هنضيف لهم كمان شاهيد .. ممثل يستحق الاحترام .. كان رائع فى مشهده مع تابو وهو حاضنها وبيترجاها تقوله ان ابوه حي .. وكان مفاجئه وهو عامل مجنون .. حقيقي اذهلني .. شاهيد قلب كل الموازين وفى الوقت اللى بوليوود عماله تقول ان رانبير هو نجم الجيل وانه نجم الشباك .. شاهيد قال انا #هنا .. ادائه يستحق 5/5 بردو
كي كي منون : الراجل دة شكله مش مريح بطبيعة الحال .. ممثل قدير ورائع ودايما شرير .. اداؤه لدور كلوديوس او كورام مير .. اللى بيشتهي مرات اخوه .. ولعل هو ده السبب اللى دفعه لانه يقتل اخوه هو انه يتجوز غزاله .. سعيه لانه يستخدم الموقف السياسي ويصعد على دم الناس وينجح فى الانتخابات .. مش جديد علينا .. ضحكني من قلبي لما كان بيقول للراجل العجوز .. ابنك متمرد ودى فيها معقتل مش هيخرج منه .. بس هساعدك وهلبسه قضيه يتسجن فيها لاخر العمر وابقي خدمتك .. ايه الذل ده .. !! جسد شخصيه مستفزه وحقيره لابعد حد ونجح في انه يخليك مش طايقه من كل قلبك .. لا وكمان بيصلي squint رمز تعبيري .. عجبني اوى مشهده فى النهايه وهو بيترجي حيدر يقتله وينتقم .. بس ميعرفش ان الانتقام الحقيقي هو انه يعيش وحيد مذلول يشرب كل يوم من نفس كاس الالم اللى شربه لناس كتير .. ادائه كان مميز يستحق 4.5/5
عرفان خان : اضافته للفيلم هي رساله واضحه من المخرج لان دة فيلم السنه وده فيلم 2014 .. وجود عرفان خان او نواز الدين صديقي ده بيدي لاى فيلم وزن ورونق وهيبه .. دوره صغير جدا فهو الروح او الشبح اللى بتدخل حياه حيدر الشاب المخدوع عشان تقلب حياته 180 درجه .. وزي ماظهر فى الفيلم فجأه وبدون مبرر اختفي فجأه وبدون مبرر ..
شرادها كابور : اوفيليا او ارشيا صحفيه صغنونه .. وهي حبيبة حيدر .. دورها مكنش كبير ومكنش مهم .. بوضوح شرادها مشاركتها فى الفيلم دة عشان بس يتكتب فى مسيرتها انها كانت جزء من فريق عمل حيدر مش اكتر .. وخصوصا بعد نجاحها فى اشقي وايك فيلان .. كان المفروض تقدم دور قوي مش دور بسيط زي دة .. ولكن زي ما قولتلكم هي اشتركت فيه عشان اسمها ومسيرتها مش اكتر .. دورها كان رقيق .. وبسيط عجبني انها قدرت تتعلم اللغه الكشميريه وخصوصا الانجلش بتاعهم واتقنته فى الفيلم اوى تستحق 3.5/5
ناريندرا شاه : مظهرش غير فى مشاهد تتعد على الصوابع بس الاهم هو صوته اللى هيفضل معانا لاخر الفيلم ..
#تحليل :
- بداية الفيلم عاديه جدا كل السائد هو اجواء كئيبه وخوف .. وشوارع فاضيه .. تخليك ماتتحمسش اد ما تتحفز .. تقلق .. تستغرب ..
- احداث الفيلم مش متصاعده .. يعنى ناس كتير انتقدت النص التاني من الفيلم وقالوا انه ممل مقارنة بالنص الاول .. بس انا شايفه ان الفيلم كله ماشي على وتيره واحده .. احيانا يفاجئك فاتتخض وتركز .. وبعد كدة ترجع تنام تاني .. ويشدك حدث معين .. ويريح بعد كدة .. وهكذا ..
- الفيلم تميز بالاطار السوداوي الكئيب .. بالذل .. بالدم .. وصلك بالظبط كل احساس بالاشمئزاز والاحتقار .. وصلك احساس المهانه .. اد ايه الاستعمار وحش .. اد ايه الخيانه مره .. والانتقام امر .. بأختصار هتقوم عايز تضرب نفسك طلقه وتخلص من كتر الكآبه المكثفه اللى هتاخدها .. ودة شئ يحسب للمخرج انه قدر يوصلنا مشاعر الشعب الكشميرى المكلوم ومعانتهم ..
- الديكور فى الفيلم مكنش استديو .. الفيلم اتصور فى قلب كشمير .. فى شوارعها .. الطقس البارد .. التلج والدم .. المقابر الجماعيه فعلا اتوجدت فى كشمير .. ناس كتير مفقوده ومدفونه مع بعض .. ومحدش عارف هما مين ..
- الموسيقي عجبتني .. رغم انها نالت انتقاد لا بأس به .. بس شخصيا .. حسيت انها مناسبه للاجواء السوداويه فى الفيلم .. موسيقي تسمعها تضايق وتقلق نفساويا كدة .. .. مظنش انكم هتحطوها على تليفوناتكم ابداً .. بس كانت مناسبه للفيلم
- سيناريو الفيلم #عبقرى .. متفصل بحرفيه مهوله .. علق معايا حاجات كتير منها :
"الحريه ابعد ماتكون عن الانتقام "
"الانتقام لا يولد سوي الانتقام "
" عقابك هو انك تعيش "
"انا اثق بشكوكي واشك بما اثق به "
" كل اجاباتي تقع بداخل اسئله اخري "
" كنت اغار عليك من ابي .. ماذا افعل وانا اراك بحضن اخيه ؟"
- الفيلم بشجاعه غير مسبوقه بهدل الجيش الهندي وكشف تجاوزاتهم وكشف ان الهند رغم انها من اقوي جيوش العالم الا انها زي غيرها .. مليانه معتقلات تحت الارض .. وسجون الله يصبر اللى موجودين ورا قضبانها .. ودة ان دل فهو بيدل على ان الانسان واحد مهما اختلفت الدوله .. معدوم الانسانيه !
- هدف الفيلم واضح وعبقرى مهما يحصل بلاش انتقام .. الانتقام بيولد انتقام .. وبيولد جواك قيد من الكراهيه والمراره .. بيخليك عبد ليها .. الانتقام لو انك تقتل .. فاعرف ان الحياه اكبر عقاب للكل ..
- الفيلم للمخرج فيشال وعرفتكم عليه فى الاول وانتاجه مع شاهيد كابور وسيدارث روي كابور ..
- الفيلم رغم كل الانتقادات اللى واجهته بداية من مظاهرات الطلاب فى الجامعه بكشمير اعتراضاً على تصوير الفيلم فيها لحد هاشتاج #قاطعوا_حيدر وهاشتاج#حيدر_السينما_الحقيقيه .. والانقسام الواسع اللى واجهه الفيلم يوم افتتاحه واللى حضرناه معاكم لحظه بلحظه .. الا انه نجح .. بأبطاله بأداؤه بأخراجه وقصته والسيناريو الخاص به .. دة مش فيلم "للفيلم فير " .. انما فيلم للأوسكار ..
- نهاية الفيلم .. فخمه .. مؤلمه .. هي دي نهاية الكراهيه والحرب .. منظر الجثث وهي مرميه فى كل مكان يوجع .. بس اللى كان عبقرى فعلا .. هو ان كورام مير ممتش .. وهياخد جزائه عايش عاجز ووحيد .. وان حيدر نجي .. فى الراويه بيصاب هاملت بجرح قاتل من سيف مسموم .. بس ياتري هيموت ولا هيتعالج .. مش مهم .. المهم انه حقق هدفه ..
- نسيت اقولكم ان اغنيه " BISMIL" جزء مهم جدا من مسرحية هاملت .. لان بييجي هاملت بيبقى مش عارف يصدق الشبح ولالا .. فابعد سنه من جواز عمه بأمه بيقدم حفله ليهم وبييحكي فيها قصه الخيانه اللى عملها عمه .. وطبعا بيظهر الارتباك علي وشه .. وبيسيب القاعه .. وبيتأكد هاملت ان عمه هو اللى قتل ابوه .. ودي قصه اغنية BISMIL .. اقوي اغنيه اتقدمت فى الفيلم كله .. واقوي عرض راقص انا شفته فردي فى 2014 ..
#سلبيات :
مفيش حاجة معينه اقدر اتكلم عنها .. بس كان ممكن الاحداث تكون مثيره ومتصاعده اكتر عشان يكسر برودة وكآبه الفيلم .. ومكنش له لزمه المشاهد الحميمه بين شاهيد وشرادها .. لان دة حرم الفيلم من انه يكون فيلم مشاهده عائليه .. رغم انه يستحق ..
تقييمي للفيلم
4.5/5
#غير_صالح_للمشاهده_العائليه