الحب ينظف الفحم .. Gunday 2014
**************************
جونداى .. افتتاحية ياش راج تشوبرا لعام 2014 .. والفيلم اللى طال انتظاره والثنائيه الجميله اللى بين رانفير وارجون .. فيلم كنا منتظرينه على احر من جمر .. نبدأ :
القصه :
طفلين بعد تقسيم الهند اتشردوا .. وبيكونوا عصابه للفحم وبيكونوا من اكبر عصابات كولكاتا .. الى ان تظهر نانديتا .. وتحمل معها المشاكل ..
بطولة:
رانفير سينغ : بيكرام
ارجون كابور : بالا
بريانكا تشوبرا : نانديتا
عرفان خان : الظابط ساركار
الاداء :
رانقير سينغ : بداية كدة .. هو بيعمل شعره عند مين .. عايزه اعمل شعرى عند الكوافير بتاعه .. دوره كالرجل الذكى المتمهل كان مناسب ليه جداً دوره كالفتى العاشق متفصل عليه .. مش بقتنع برانفير فى ادوار الشر .. مش بتليق عليه اصلا .. لان وشه كله رومانسيه .. وطبعا مش هنعتبر ان دوره فى Ladies vs Ricky Bahl دور شر ... كان نصاب واول ما وقع فى الحب تاب اصلا .. يعنى نصاب بيتلكك .. حبيت اداؤه اوى .. حبيت دموعه .. حبيت حزنه .. رانفير بينضج فى كل فيلم اكتر من الاول .. بعشق فيه لما يتجرح اوى ويتكلم ودموعه خانقاه .. بحس ان كلامه جاى من ابعد مكان فى نفسه .. اداؤه كان رائع 4/5
ارجون كابور : دوره كرجل العصابات المتهور الطايش .. كان رائع .. نفس رأيى فى رانفير مش بقتنع بأرجون فى ادوار الرومانسيه .. ارجون ممتاز فى ادوار الكوميديا والشر .. الشر الخام .. يعنى زى سانجاى دوت فى Agneepath اهو ارجون من نفس العينه الهباب دى .. ملامح الشر فيه رهيبه .. وكوميديان عالى اوى .. وطفل جميل اوى اوى .. فادور كان متفصل عليه .. وندمه كان جميل .. ودموعه صدقتها اوى ... وانا واثقه ان ارجون بكره وبعده هيكون نجم صف اول .. لو استمر على كدة اداؤه يستحق بردو 4/5
بريانكا تشوبرا : دورها كفتاة الليل والظابط الجاسوسه .. بالنسبالى مكنش جديد .. عملت دور مشابه فى Don 2006 مع فرق هائل فى حجم الاداء .. اداؤها كان بالمسطره مفيهوش غلطه ودة شئ طبيعى من نجمه بوزنها .. بس نفس اللى هقوله عليها لما كتبت تقرير Zanjeer (2013 film) و تقرير Krrish 3 هى دى بريانكا تشوبرا .. ؟؟ بريانكا حجمها اكبر من انها تقف فى دور تانى .. هى دى بريانكا اللى عملت Fashion - Official Movie Page Don 2 Saat Khoon Maaf Barfi! هى دى .. بريانكا حجمها اكبر من انها تعمل الادوار البسيطه دى .. انا مش بنتقد ادائها ركزوا .. انا بنتقد اختيارها اصلا .. كنت بتناقش مع مي فاقالتلى كان نفسي ييجى بدالها ديبيكا او انوشكا .. وقولتلها ممكن سوناكشى كمان .. يعنى فى بدايل كتير غير نجمه بوزن بريانكا .. المهم ادائها عجبنى جداً وكان صادق جداً حبيت مشهدها وهى مع ارجون وبتقوله اقتلنى .. ومشهدها فى النهايه ماتت الف مره وهى بتؤدى واجبها ... كانت جميله 3.5/5
عرفان خان : الراجل دة انا بخاف منه .. وحش شاشه بكل ما تحمل الكلمه من معانى .. اداؤه عبقرى تحليلاته وشخصيته وذكاؤه .. هو كله على بعضه خطير .. واداؤه كالعاده ممتاز .. يستحق 4.5/5
تحليل :
- بداية الفيلم .. عاديه .. هو جايبلك القصه من اولها .. بمنتهى البساطه .. وبتبدأ الاحداث تتدرج بشكل منطقى وسلس .. للعقده والنهايه ..
- نهاية الفيلم قهرتنى .. بس معرفش ليه تقبلتها ومصدمتنيش .. رغم ان كان نفسى تكون مختلفه .. عشان الناس تخرج مبسوطه .. لكن فى خضم السياق النهايه محترمه وعادله ..
- دور بريانكا كان مفاجئه بالنسبالى .. لما اكتشف هى مين فى النهايه اتصدمت فعلا .. تفاعلت معاها جدا .. انها بقت فى النص بين مهمتها وقلبها .. ضايقنى بس ان كان شكلها اكبر منهم .. اداؤها لدور راقصة السبعينات كان رائع .. رقصاتهم ناعمه وجميله
- ناس كتير انتقدت السيناريو فى الفيلم .. ومع ذلك انا حبيته .. وعلق معايا اجزاء كتير منه زى :
"انا كالفحم .. لا ينظف مهما غسلتيه "
" صديق مجروح اسوأ من العدو "
وحاجات غيرها كتير ..
- ثنائيه رانفير وارجون عبقريه .. بيكملوا بعض .. لان زى ما قولت واحد مش بيليق فى الرومانسيه والتانى مش بيليق فى الشر .. صداقتهم كانت جميله .. وحشنا النوع دة من الافلام .. فكرنى بصداقه اميتابتشان ودارمندر .. ريشى كابور .. الناس الحلوه دة ..
- التصوير فى مناجم الفحم جديد .. او بصفه اصح .. احييوا الافلام القديمه اللى كانت بتتصور فى مناجم الفحم .. زى افلام اميتابتشان ..
- عشقت عامل الكوميديا اللى فى الفيلم .. ارجون ورانفير دمهم شربات .. فانت هتحس بكوكتيل كدة .. هتتوجع شويه وتضحك شويه وتعيط شويه ..
- من ضمن المشاهد اللى حبيتها .. لما رانفير عرف حقيقة بريانكا .. وضحكة الاسى اللى ظهرت عليه .. ومشهد ارجون وهو بيقول لصديقه مبعرفش اعتذر .. بس سامحنى .. ياااااه يا عبد الصمد
- الفيلم من اخراج Ali Abbas Zafar وهو اللى اخرج افلام ناجحه كتير لياش تشوبرا زى Mere Brother Ki Dulhan Badmaash Company .. وعشان كدة الاخراج كان رائع وسليم ..
الاغانى:
الالبوم كان جميل وضم مطربين عمالقه زى "KK the Ultimate Singer" Arjit singh Neeti Mohan
الاغانى اللى عجبتنى :
"Asalaam-E-Ishqum"
"Saaiyaan"
"Jiya"
"Tune Maari Entriyaan"
الاربع اغانى دول .. عجبونى اوى اوى اوى ..
الفيلم يستحق المشاهده جداً واكتر من مره
صالح للمشاهده العائليه
تقييمى
3.8/5