تقرير عن فيلم Shaadi Ke Side Effects 2014

 

يوميات زوج طهقان .. Shaadi Ke Side Effects
*******************************
الفيلم اللى طال انتظارى له .. لقاء السحاب فرحان وفيديا 
اللى ماتفرجش على الفيلم ميقراش التقرير

القصه :
الفيلم بيناقش ببساطه الحياه الزوجيه قبل الانجاب وبعد انجاب الطفل الاول ..

البطوله :
فرحان اختر : سيدهارث روى
فيديا بالان : تريشا

الاداء:
فرحان اختر : ايه السكر دة !! .. فرحان اختر بيقولوا عليه انه خليفة عامر خان وبصراحه .. مغلطوش .. افلام فرحان كلها عبقريه سواء كان المخرج او الممثل .. دوره جديد عليه الزوج والاب .. اللى بيحب مراته بس مش قادر يتحمل تغيير الحياه بعد انجاب ميلى بنتهم .. !! اداؤه كان جميل وتلقائى .. 4.5/5

فيديا بالان: بردو بيقولوا عليها خليفه عامر خان وماشيه على نهجه .. وبردو مغلطوش   .. دورها مكنش جديد .. شفناها ام قبل كدة وشفناها حامل وماشيه تتكعور قبل كدة  .. بس كست بيت ضاربه الايشارب ولابسه شئ قريب بالجلابيه .. دة جديد .. كانت جميله .. وادائها كالعاده كان قوى .. بس مقدرتش تجارى بصراحه فرحان .. وخصوصا ان دورها كان صغير لان كل التركيز كان على فرحان ... يعنى ممكن اديها 3.5/5

تحليل:
- قصة الفيلم جديده .. واقعيه .. مش حلم ولا خيال .. كل بيت حياته قبل البيبى حاجة وبعده حاجة تانيه ..

- نص الفيلم الاول ممتع ومسلى بشكل اكتر من النص التانى .. فى كمية مواقف كوميديه عبقريه ..

- الفيلم عرض كزا حياة زوجيه حياة سيدهارث الصادقه وحياة نسيبه المليانه كذب وخداع ..

-الكيميا بين فرحان وفيديا كانت حلوه .. زى ما قولتلكم فى الاول .. لقاء السحاب .. 

- الفيلم لايت .. كوميدى .. رومانسى .. بيقدم رساله حلوه وهى ان مش معنى ان بقى فى بيبى .. اننا ننسي بعض .. او ننشغل عن بعض ..

- السيناريو بتاع الفيلم حلو .. وبيقدم فكرة ان احياناً الستات بيكونوا غامضين .. يعنى الجزء اللى بتقوله فيه .. "كنت اريدك الا تريد ان تذهب "   .. فعلا النساء من المريخ والرجال من الزهره 

-الفيلم للمخرج Saket Chaudhary وهو مخرج فيلم Pyaar Ke Side Effects 2006 

سلبيات :
- المشاهد الخارجه ... مكنش ليها لازمه اوى ..

- كدبة شيكار عبيطه اوى .. ورد فعل فرحان اعبط ..

- نهاية الفيلم معجبتنيش .. هو اتعلم وصحح اخطاؤه عشان تتهرب هي ..

- الفيلم ركز على معاناة الزوج بعد الانجاب .. طيب والزوجه .. اختزلوا معانتها فى جملتين اخر الفيلم .. لو الفيلم اتقسم ووضح معانة الزوج والزوجه كان بقى افضل ..

الاغانى
مش بطاله .. الالبوم ضم مطربين زى Neeti Mohan Arijit Singh Mohit Chauhan

علق معايا اغنيتين حلوين اووووى

"Desi Romance"
"I'm Sorry Par Tumse Pyar Ho Gaya"
اغنيتين فى منتهى الرومانسيه والنعومه وحاجة اخر دلع كدة ..

الفيلم يستحق المشاهده اكتر من مره ..
غير صالح للمشاهده العائليه

تقييمى له
3.5/5